Puna në grup është një mundësi e shkëlqyer për të analizuar, diskutuar dhe eksploruar ide me studentët e tjerë. Kjo ju jep mundësi të zhvilloni aftësi kyçe të transferueshme, siç janë organizimi, komunikimi, udhëheqja dhe zgjidhja e problemeve. Përveç kësaj, mund të jetë jashtëzakonisht e dobishme si për performancën tuaj akademike ashtu edhe për zhvillimin personal afatgjatë, pasi aftësia për të punuar mirë me të tjerët është një nga kërkesat kryesore në punën tuaj të ardhshme. Ndiqni këto 3 këshilla për punën në grup që të keni sukses:
1. Vendosni qëllime të qarta
Në fillimin e çdo projekti në grup, ju duhet të bëni një takim të parë për të rënë dakord për objektivat specifikë dhe për të vendosur disa rregulla bazë. Vendosni sa shpesh do të takoheni, si do të komunikoni me njëri-tjetrin dhe si do të drejtohet grupi.
Ju gjithashtu duhet të siguroheni që të gjithë anëtarët e grupit ta kenë kuptuar qartë thelbin e projektit.
2. Sigurohuni që të gjithë të kontribuojnë
Çdo anëtar i grupit duhet të përpiqet të krijojnë një atmosferë mbështetëse që lejon të gjithë të tjerët të ndihen të qetë për të shprehur mendimet e tyre pa kërcënimin se do të hidhen poshtë, tallen ose injorohen.
Ndërsa disa njerëz janë të sigurt në situatat e punës në grup, të tjerëve mund t’ju duket sfiduese pjesëmarrja në një ekip.
Jo çdokush mund të ketë tipare udhëheqësi apo të jetë në gjendje të gjenerojë shpejt ide. Në të vërtetë, grupet më të mira kanë një përzierje të ekuilibruar të individëve, kontributet e të cilëve plotësojnë njëri-tjetrin. Shtatë rolet që mund të luajë secili anëtar i një grupi janë:
- Negociatori – Përpiqet për të ruajtur harmoninë dhe raportin midis të gjithë anëtarëve të ekipit duke inkurajuar të tjerët dhe duke njohur dhe zgjidhur çdo mospajtim të mendimeve.
- Inkurajuesi – Mbush me energji ekipin përmes humorit ose entuziazmit, duke sugjeruar ide dhe duke bërë ballafaqimin për ndonjë problem.
- Vlerësuesi – Ofron analizë kritike të të gjitha opsioneve përpara se të arrini në një përfundim të caktuar.
- Ideatori – Sugjeron mënyra të reja origjinale dhe potencialisht radikale për të organizuar detyrën ose zgjidhjen e problemeve.
- Udhëheqësi – Siguron që grupi të mbetet në detyrë, duke koordinuar burimet, duke caktuar detyra dhe duke udhëhequr anëtarët për të arritur një rezultat përfundimtar pozitiv.
- Menaxheri – e mban grupin të përqëndruar dhe të organizuar brenda afatit kohor, duke siguruar që çdo anëtar i kupton përgjegjësitë e veta individuale.
- Përmbledhësi – Sqaron objektivat dhe shtjellon idetë e të tjerëve, duke përmbledhur diskutimin dhe përfundimet e grupit.
3. Shmangni negativitetin
Në qoftë se nuk doni të rrezikoni seriozisht mundësitë tuaja për sukses, disa sjellje duhet të shmangen me çdo kusht. Do të kuptoni se detyra juaj mund të mos realizohet siç duhet, nëse edhe vetëm një pjesëmarrës:
- bëhet tepër agresiv
- shfaq pakënaqësi me çdo vendim të marrë
- nuk respekton të tjerët dhe kritikon idetë e tyre pa sugjeruar alternativa
- merr të gjithë vëmendjen duke bërë shaka të tepruara
- nuk arrin të kontribuojë
- dëgjon shumë pak dhe i ndërpret të tjerët kur flasin
- flet shumë dhe mbizotëron në diskutime
Ndiqni këto 3 këshilla për punën në grup dhe ndërsa mosmarrëveshjet janë të pashmangshme, është e rëndësishme të mos i merrni gjërat personale.
Burimi: prospects.ac.uk